இன்று ஒரு ஆசனம் (10) – நின்ற தனுராசனம் (Standing Bow Pose)

இன்று நாம் பார்க்கவிருப்பது நின்ற தனுராசனம். இதை ப்ரசாரித பாதோத்தானாசனத்திற்கு மாற்று ஆசனமாகச் செய்யலாம். தனுராசனம் என்றால் வில் நிலை ஆகும். இதை குப்புறப்படுத்தும் செய்யலாம். நின்ற நிலையிலும் செய்யலாம். இவ்வாசனத்தின் பலன்கள் நம்மை பிரமிப்படைய வைக்கிறது. இந்த ஆசனத்தைச் செய்வதனால் இரத்த ஓட்டம் செழுமையடையும், நரம்பு வீரியமாகும். உடலின் அணுக்கள் புதுப்பிக்கப்பட்டு இளமை ஓங்கியிருக்கும். இவ்வளவு உயர்ந்த நன்மைகள் நமக்கு இந்த ஆசனத்தின் மூலம் கிடைக்க என்ன காரணம்? முதலில் அதை புரிந்து கொள்வோம்.

முதலில் வில்லைக் கற்பனை செய்து கொள்ளுங்கள். வளையாத நேரான திடமான கம்பை வளைத்து நாண் பூட்டுவதுதானே வில்? கம்பு எவ்வளவு இறுக்கமாக வளைகிறதோ வில்லின் எய்யும் திறன் அவ்வளவு அதிகமாக இருக்கும். அம்பின் வேகத்தை வில்தானே தீர்மானிக்கிறது. அம்பிற்குத் தனியாக பலம் இல்லை. அதனால்தான், “எய்தவன் இருக்க அம்பை நோவானேன்” என்று பழமொழி கூறுகிறது. நம் உடலில் உள்ள வில் எது? சரியாகச் சொன்னால், வில்லுக்கான கம்பு எது என்பதுதான். நம் உடலின் பின்பகுதியிலுள்ள முதுகுத்தண்டுதான் அந்த கம்பு. இந்த கம்பிலிருந்துதான் அனைத்து உறுப்புகளுக்கும் இயக்க சக்தி போய்க் கொண்டிருக்கிறது. அந்த இயக்க சக்திதான் அம்பு. இந்த அம்பு, வேகமாக, கூர்மையாக இலக்கை அடைய வேண்டுமானால், வில் திடமானதாக இருக்க வேண்டும். அதாவது, நமது தண்டுவடம் சக்தி வாய்ந்ததாக இருக்க வேண்டும். பரிணாம வளர்ச்சியில் நாம் ஆறறிவு படைத்த சமூக விலங்காக மாறியதற்குக் காரணமே படுக்கை நிலையிலிருந்த முதுகுத்தண்டை அதன் எதிர்த்திசையில் நிமிர்த்தியதால்தான் என்கிறது அறிவியல். ஆக, முதுகுத்தண்டை அதன் எதிர்த்திசையில் வளைப்பதனால் அளப்பறிய பலன்களைப் பெற முடியும்.

அப்படி வளைப்பதற்கான பயிற்சிதான் இந்த ஆசனம். இந்த ஆசனத்தில் முதுகைப் பின்னோக்கி வளைக்கும்போது குறிப்பாக முதுகுத்தண்டு வளைகிறது. அதன் மூலம் தண்டுவடம் முழுதும் உயிர்சக்தி பாய்ந்துத் தண்டைப் பலப்படுத்துகிறது. அதன் மூலம் அனைத்து உறுப்புகளுக்கும் இயக்க சக்தி அபரிமிதமாக பாய்கிறது. உயிராற்றல் வளர்கிறது. மேல் சொன்ன உயர்வான நன்மைகளுக்கு அதுவே காரணம்.

முதுகுத்தண்டு எனும் வில்லை வளைத்து, கைகளால் கால்களைப் பிடித்து நாண் பூட்டி இயக்க சக்தி எனும் அம்பை எய்வதால் இதற்கு தனுராசனம் என்று பெயர். மேலும் பலன்களை பார்ப்போம்.

ப்ரசாரித பாதோத்தானாசனம் பலன்கள் மற்றும் செய்முறை பற்றி படிக்க இந்தப் பக்கத்திற்குச் செல்லவும்.