இன்று ஒரு ஆசனம் (74) – மயூராசனம் (Peacock Pose)

செய்முறை

• வஜ்ஜிராசன நிலையில் அமரவும்.
• இரண்டு கால்களையும் விரிக்கவும்.
• தோள்களைச் சற்று முன்னால் சாய்த்து கால் முட்டிகளுக்கு இடையில் உள்ளங்கைகளை வைக்கவும். கை விரல்கள் உங்களை நோக்கியவாறு இருக்க வேண்டும்.
• கை முட்டிகளை மடக்கவும். இப்பொழுது உங்கள் மேற்கைகள் மேல் உங்கள் மேல் உடல் இருக்கும்.
• மெதுவாக கால்களை நீட்டி கால் விரல்கள் தரையில் இருக்குமாறு வைக்கவும். இப்பொழுது உங்கள் உள்ளங்கைகளும் கால் விரல்களும் தரையில் உடல் எடையைத் தாங்கியவாறு இருக்கும்.
• உடலின் மத்திய பகுதியை சற்றே முன்னால் செலுத்தி கால்களைத் தரையிலிருந்து உயர்த்தவும். இப்பொழுது உங்கள் உடலின் எடையை உங்கள் கைகள் தாங்கியிருக்கும்.
• தலையைச் சற்றே உயர்த்தலாம் அல்லது தரையை நோக்கி இருக்குமாறு வைக்கலாம்.
• 20 வினாடிகள் இந்நிலையில் இருந்த பின் கால்களைத் தாழ்த்தி கால் விரல்கள் தரையில் படுமாறு வைக்கவும்.
• பின் கால் முட்டியை மடக்கி வஜ்ஜிராசனத்தில் அமரவும்.
• பாலாசனத்தில் உடலைத் தளர்த்தவும்.

(பாலாசனம் செய்முறையைப் பார்க்க இந்தப் பக்கத்துக்குச் செல்லவும்).

குறிப்பு

மணிக்கட்டு, கை முட்டி மற்றும் தோள்களில் தீவிர பிரச்சினை உள்ளவர்கள் மயூராசனத்தைத் தவிர்க்கவும்.

மயூராசனம் ஒரு சவாலான ஆசனம் என்பதால் அதை பயிலும் போது செய்து விட வேண்டும் என்ற எண்ணம் சற்று தூக்கலாகவே இருக்கும். ஆனால், இவ்வாசனத்தைப் பயிலும் போது கூடுதல் கவனம் தேவை. மேல் உடலை அதிகமாக முன்னால் கொண்டு போனால், முகம் வேகமாகத் தரையை நோக்கி போகக் கூடும். உடல் எடை எதாவது ஒரு பகுதியில் அதிகமாக இருக்குமாறு பயின்றால், மணிக்கட்டில் தீவிர வலி ஏற்படலாம்.

எனவே, முதன் முறையாகப் பயில்பவர்கள், ஒவ்வொரு காலாக மேலே தூக்கி சற்று நேரம் அந்நிலையில் இருந்து பழகிய பின் இரண்டு கால்களையும் உயர்த்தலாம்.

அல்லது, பாதத்திற்குக் கீழ் yoga block-ஐ வைத்து அதன் மேல் கால்களை வைத்துப் பழகலாம்.