சமச்சீர் உணவின் நன்மைகள்; பழந்தமிழர் வாழ்வில் சமச்சீர் உணவு

சங்ககால தமிழரின் வாழ்வில் சமச்சீர் உணவு முறை

சங்ககாலத்தில், தமிழர்கள் தாங்கள் வாழ்ந்த நிலப்பகுதியை அதன் தன்மைக்கேற்றாற் போல் அய்ந்து வகையாகப் பிரித்தனர். அவை:

1) குறிஞ்சி – மலையும் மலையைச் சார்ந்த பகுதியும்

2) முல்லை – காடும் காட்டைச் சார்ந்த பகுதியும்

3) மருதம் – வயலும் வயலைச் சார்ந்த பகுதியும்

4) நெய்தல் – கடலும் கடலைச் சார்ந்த பகுதியும்

5) பாலை – மணலும் மணலைச் சார்ந்த பகுதியும்

இந்த ஐவகை நிலங்களுக்கும் உணவு முதல் கடவுள் வரை தனித்தனியாக அனைத்தும் வரையறுக்கப்பட்டுள்ளன. 

தொல்காப்பியம் பாலையைத் தவிர்த்த நான்கு வகை நிலங்கள் பற்றி விவரிக்கிறது. ஆனால், பின்னால் இயற்றப்பட்ட சிலப்பதிகாரத்தில் பாலை உட்படை ஐந்திணைகளும் குறிப்பிடப்பட்டுள்ளன. குறிஞ்சியும் முல்லையும் நீண்ட காலம் மழை பொழியாமல் வறண்டு போகும் போது உருவாவதுதான் பாலை என்று சிலப்பதிகாரம் கூறுகிறது. 

ஐந்து வகை நிலங்களைச் சார்ந்த மக்களின் உணவுமுறையாக பண்டைய இலக்கியங்களில் கூறப்படுபவை:

குறிஞ்சி – கிழங்கு வகைகள், பலா, மூங்கில் அரிசி, தேன், வரகு, தினை, எள், இறைச்சி, வெண்ணெய் முதலியவை

முல்லை – சாமை, வரகு, பால், வெண்ணெய், கிழங்கு, காட்டு விலங்கின் இறைச்சி

மருதம் – செந்நெல், நெல் சோறு, உளுந்து களி, பழஞ்சோறு, பனங்கள், 

நெய்தல் – மீன், அரிசி சோறு, பனங்கள்

பாலை – கிடைப்பதைக் கொண்டே வாழ்ந்தனர்

இதில் குறிப்பிடத்தக்கது என்னவென்றால், ஒவ்வொரு நிலத்தை சார்ந்தவர்களின் பிரதான உணவாக அவர்கள் பகுதியில் கிடைக்கக் கூடிய உணவாக இருந்திருக்கிறது. ஆனாலும், பண்டமாற்று முறையில் மற்றைய பகுதிகளின் இயல்பான உணவையும் பெற்று உண்டு வாழ்ந்திருக்கின்றனர். 

மண் சார்ந்த உணவு முறையோடு பண்டமாற்றின் மூலம் பெற்ற உணவையும் பார்க்கும் போது, அனைத்து வித சத்துகளையும் பெறக் கூடிய வகையில் காய், பழம், சிறுதானியம், அரிசி, கொழுப்பு பொருட்கள் மற்றும் இறைச்சி என அனைத்தும் அவர்களின் உணவில் இடம்பெற்றிருந்ததை அறிய முடிகிறது. 

சங்க கால உணவு முறை பற்றி நான் படிக்க வாய்ப்பு கிடைத்த ஒரு கட்டுரை மிகவும் சிறப்பாக இருந்தது. அந்தக் கட்டுரையைப் படிக்க இந்தப் பக்கத்திற்குச் செல்லவும்.

நவீன காலத்தில் கூறப்படுவது போல், சமச்சீர் உணவின் விகிதாச்சாரத்தை  போன்று சத்துகள் சார்ந்து எதாவது அடிப்படை நெறிகளை வகுத்திருந்திருந்தாலும் ஆச்சரியமில்லை. ஆனால், கடுமையான உடல் உழைப்போடு கூடிய மண்ணுக்கேற்ற உணவு முறையும் உண்ணும் முறையும்தான் நம் முன்னோர்கள் மிகுந்த நலமுடன் வாழக் காரணமாயிருந்திருக்கின்றன. 

ஆக, நாம் உண்ணும் உணவில் அனைத்து சத்துகளையும் சேர்த்துக் கொள்வதன் மூலம் சமச்சீர் உணவின் நன்மைகள் அனைத்தையும் பெற வேண்டுமானால், உடற்பயிற்சி செய்தலும், இரவில் ஆழ்ந்த, ஆரோக்கியமான உறக்கம் கொள்ளுதலும் அத்தியாவசியமானது.