திருமூலர் திருமந்திரம் தொன்மையின் மீட்டெடுப்பு – கடவுள் வாழ்த்து

இதுவரை படித்து வந்தவர்களின் மனதில் இயல்பாக பின்வரும் கேள்விகள் எழலாம்:

1. இந்த விளக்கங்கள் அனைத்தும்  ஏன் ஆசிரியரின் கோணமாக இருக்கக் கூடாது? தமிழ் என்பது மிகவும் வளமான மொழி. ஒவ்வொரு வார்த்தைக்குமே பல பொருள் இருக்கக் கூடிய வளமான தன்மை கொண்டது. அப்படியிருக்க, இது ஏன் ஆசிரியர் கூறும் விளக்கமாக இருக்க வேண்டும்?
2. இந்த நூலில் குறிப்பிடப்பட்டுள்ள விளக்கங்கள் சரியானது என்றால், இவ்வாறான பொருளில்தான் திருமூலர் எழுதியிருந்தால், ஏன், இந்தப் பாடல்கள் அனைத்தும் இறைவன் சார்ந்த பாடல்களாகவே காலம் காலமாகக் கருதப்பட்டு வந்தன? 

முதல் கேள்விக்கு வருவோம். இதற்கான பதிலை நூலாசிரியரே தன் புத்தகத்தில் கூறியுள்ளார். அந்த வரிகளை அப்படியே தருகிறேன்; “பொதுவாக, திருக்குறள், திருமந்திரம் போன்ற பாடல்களை உரையாக்கும் போது உரையாக்குபவருடைய கண்ணோட்டமும் நம்பிக்கையும் சார்ந்தே உரை இயற்றப்படும். அந்தத் தவறு இதில் நடந்து விடக் கூடாது என்பதில் கவனமாக இருந்து எழுதப்பட்டது. உடல் அறிவியலாக விரும்பி விளக்கப் போனால் அனைத்து பாடல்களுக்கும் விரும்பியதைத் தேடுவது சாத்தியமற்றது. அதே போல, திருமந்திரப் பாடல்களின் உண்மை அக பொருள் தொடர்ந்து விரும்பியவாறு அய்ம்பது பாடல்களிலும் பொருந்தி வருவதும் சாத்தியமற்றது. அய்ம்பதுக்கு மேலும் இது தொடர்கிறது.”

இனி, இரண்டாவது கேள்விக்கு வருவோம். இதற்கும் நூலாசிரியரின் பதிலை, இப்புத்தகத்திலிருந்தே எடுத்துத் தருகிறேன்; “உடல் அறிவியலாக எழுதப்பட்ட திருமந்திரம் ஏதோ ஒரு காலத்தில் அதன் அறிவுக் கடத்தலை இழந்திருக்க வேண்டும். பின் வந்தவர்கள் இதன் உண்மையை உணர முடியாம கடவுள் பற்றிய வர்ணனைகளாக எடுத்துக் கொண்டு சிலைகளை வடித்து வழிப்பாட்டுக்கு உரியதாக்கி விட்டிருக்க வேண்டும். இப்போது, உடற்கூறு அறிவியல் வளர்ந்திருப்பதாலேயே நம்மால் பொருத்தி புரிந்து கொள்ள முடிகிறது. எடுத்துகாட்டுக்கு, இரத்தம் மச்சையில் உற்பத்தியாகிறது என்ற அறிவு தெரிந்திருப்பதாலேயே அந்த குறிப்பிட்ட பாடலின் உள்பொருளைப் புரிந்து கொள்ள முடிகிறது. இந்த வாய்ப்பு முன்பிருந்தவர்களுக்குக் கிட்டாததால் அவர்களால் அறிவியலை பொருத்தி பார்க்க முடியவில்லை. ஆனால், அன்று நம் தாத்தாக்கள் சொன்ன உடற்கூறு அறிவியல்தான் இன்றைய நவீன மருத்துவம் சொல்கிறது. நம்முடைய இந்த மருத்துவம் அதன் தன்மையில் சரியான திசைவழியில் வளர்ந்திருந்தால், நாம் மருத்துவத்தைத் திருமந்திரத்தில் படித்திருப்போம்.”

நூலாசிரியர் கூறியிருப்பதைப் போல, ஒரு குறிப்பிட்ட சமூக சூழலில் அவற்றை இழந்து நாம் பல ஆயிரம் ஆண்டுகள் பின்தள்ளிப் போய் விட்டோம். திருமூலரின் திருமந்திரம் தொன்மையின் மீட்டெடுப்பு – கடவுள் வாழ்த்து என்கிற இந்தப் புத்தகத்தின் வாயிலாக, தமிழரசு நமது தொன்மையை மீட்டெடுக்கும் முயற்சியில், நாம் சிறந்த அறிவியல் சமூகத்திற்கு சொந்தக்காரர்கள் என்பதை பறைசாற்றும் முயற்சியில் இறங்கியுள்ளார். 

திருமூலரின் திருமந்திரம் தொன்மையின் மீட்டெடுப்பு – கடவுள் வாழ்த்து புத்தகத்தை வாங்க, இந்த இணைப்பிற்குச் செல்லவும்.