இன்று ஒரு ஆசனம் (5) – ப்ரசாரித பாதோத்தானாசனம் / Wide-Legged Forward Bend

நின்று முன் குனியும் ஆசன வரிசையில் சற்று வித்தியாசமான முறையில் செய்வது Wide-Legged Forward Bend என்று ஆங்கிலத்தில் அழைக்கப்படும் இந்த ப்ரசாரித பாதோத்தானாசனம். “ப்ரசாரித” என்றால் “வெளிப்புறம் விரித்தல்” ஆகும், “பாதா” என்றால் “பாதம்”, “உட்” என்றால் “ஆற்றல்”, “தான்” என்றால் “விரித்தல்”, “ஆசனம்” என்றால் “நிலை”.

ஆற்றல் வாய்ந்த கால் விரித்த நிலையில் பாதத்தை பிடித்து நீளும் நிலை.

இதுவரை நாம் பார்த்தது கால்கள் சேர்ந்த அல்லது சிறிது இடைவெளி விட்டு நின்ற நிலையில் குனிவது. இந்த ஆசனத்தில் கால்களை நன்கு விரித்து முன் குனிந்து பாதங்களை பிடித்து தலையை தரையில் வைக்க வேண்டும். அல்லது கைகளை தரையில் வைத்து இரு கைகளுக்கு இடையில் தலையை வைக்க வேண்டும். முழுமையாக செய்ய முடியாதவர்கள் கைகளை தரையில் ஊன்றினால் போதுமானது. அதுவும் முடியாதவர்கள் முன் குனிந்து கால்களை பிடித்துக் கொண்டாலும் போதும்.

இந்த ஆசனம் பெயரிலேயே உள்ளது போல் மிகுந்த ஆற்றலை அளிக்கும் ஆசனம். இந்த நிலையில் கால்கள் விரிவடைவதால் கால் நரம்புகள் நன்கு இழுக்கப்பட்டு பலமடைகின்றன. கால்களுக்கு இடையில் உடலை எடுத்து செல்வதால் இடுப்பு அதிகமாக உந்தப்பட்டு அதன் இயக்கம் செழுமையடைகிறது. இடுப்பு பலமடைகிறது. அதனால், இடுப்பிலிருந்து முன் குனிவதால் முதுகுத்தண்டு இழுக்கப்படுகிறது. அதனால், இடுப்பிலிருந்து முதுகுத்தண்டிற்கு ஆற்றல் சீராகக் கடத்தப்படுகிறது. தரையோடு தலையை வைப்பதால் முதுகுத்தண்டிலிருந்து மூளைக்கு இரத்த ஓட்டம் சீராகப் பாய்ந்து மூளையின் செயல்திறனை அதிகரிக்கிறது.